(1930) Coplas
¡Miraila que ricachada
va esa muchina de aldea!
Pa tantu tonu, nun ye,
pur muitu que echa se crea.
-Doimi el tonu qui mirezu.
Tonta u lista, guapa u fea,
soy lu mas que puedi sesi:
soy de Cangas del Narcea.
Ricayiu mi suegra,
malpariu la vaca,
muriuseme el gochu,
el pullin nun anda,
lus cuatru cabritus,
tán plagaus de sarna.
Tengu el vientri suciu,
la lengua encanada,
saliume un cumiciu
nel medio la espalda;
nun atopu asientu,
toy feitu una lástima.
Pero nun me queju,
Tou ellu, ye nada,
y yo, toy cuntentu
en siendu de Cangas.
Pipina la Chueza
diume calabzas,
Rosa nun me quiso,
nin me quier Culasa.
Peru hey de hallar moza,
sey qui hey de alcuntrala
en cuantu arriparen
en que soy de Cangas.
Debo lus cunsumus,
debu tres fugazas,
empeñey la hierba,
malvendí la xata,
dierunme na villa
dos pesetas falsas.
Fendiu la masera,
regañou la casa,
la outra nueiti, el poti
venciu las preganzas,
caiu na chariega
y escachou dos patas.
Perdí las madreñas
fundiuse la cama,
nin tengu camisa,
nin culchón, nin sábanas.
Peru, soy muy ricu,
¡ay, esu sí, mialma!
El mundu ye miu
siendu you de Cangas.
¡Nenina querida
que guapina yes!
Pa ti ha de ser un condi,
un duque, un marqués.
Cualquiera que sea
en siendu cangués.
¿Despreciasmi, Xuaca?
Pero ¿tú nun ves
que me chamu Pepi
ya que soy cangués?